จารึกสร้างฉัตร

ลูกหมากชุมพูถ่ายใหม่แล้วด้วยรัชชะฏะ หนัก ๔๕๐ ใหย่ ๒ กำ ๓ นิ้ว สุวัณณะธองดีห่อหุ้มพายบนหนัก ๙๑ กลองสุวัณณะธองดีกาบบัวตู้มแก้วยอดสัตหนัก ๔๐๓ นับเข้าทังใบไรแลยอดรอมสุวัณณะได้น้ำหนักสัพพะทังมวร ๘๐๐ รัชชะฏะหนัก ๑๑๐๐ เข้ากันสัต ๗ ใบแล รอมคำ ปิวเสี้ยง ๑๘๙๒ แผ่น พระองเจ้าหรอคำขึ้นเสวยราชบ้านเมืองนานได้ ๖ ปลี แล้วตำนานเทิงหล้างจักได้ส้างแถมใหม่หื้อสาสนาก้านกุ่งรุ่งเรืองประเทืองบานงาม หื้อเปนถาวระวิบูล ไว้ยหื้อเปนที่ไหว้แลปู่ชาแก่คนแลเทวดาตราบ ๕๐๐๐ พระวัสสาแท้ดีหลี ด้วยนิสันทะผละนาบุญทังหลาย อันได้เลิกยกยอต่อพระมหาชินะธาตุแกนสัตแลยอดสัตขึ้นแถม ๒ ชั้น ฝูงนี้ ตนตัวข้าอันเปนอิสราธิปปะติบ้านเมือง ขอตั้งคำปะนิธานปรารถนาเปน พระอรหันตาเจ้าตนนึ่งในสำนักแห่งพระอริยะเมตไตยเจ้า อันจักเกิฏมาพายหน้านั้นแท้ อย่าคลาดอย่าคาเที่ยงแท้ดีหลี แต้มเขียนเพื่อหื้อแล้วคำบุพเจตนาแห่งมหาราชหลวงเจ้าแท้ดีหลี นิพพานะ ปัจจะโย โหตุโว นิจจัง ธุวัง ธุวัง